أول شهر بديوان، لا تعتمد المسير على ديوان لحالو. احسب الرواتب بإكسل متل العادة، وقارن موظف موظف. هيك بتكتشف أي نقص بالبيانات قبل ما يوصل لراتب حدا.
قبل المسير
- بدك «صلاحية الرواتب» بالمستوى «كامل» (شوف الأدوار)، والتحقق بخطوتين مفعّل.
- كل موظف إلو «عناصر الراتب» وطريقة دفع: ملف الموظف ← تبويب «الراتب» وتبويب «الدفع».
- «سعر الصرف» إذا في رواتب بالدولار. المسير بياخد السعر الساري بآخر يوم بالشهر.
- «مدخلات الشهر»: مكافأة أو خصم لموظف بهالشهر، مع السبب.
- «الدوام والإجازات ← شهر الدوام» ← «سكّر دوام الشهر». الصفحة بتقلّك شو ناقص قبل.
الخطوات
- «الرواتب» ← «مسير جديد». شوف «جاهزين للرواتب؟» وصلّح الناقص، وبعدين «أنشئ المسير».
- اكبس «احسب»: كل موظف بينحسب، وسعر الصرف والقوانين بيتثبّتوا.
- راجع تبويب «فحص الصحة» (بيوقّف إذا في شي غلط)، وتبويب «الموظفين»، و«شو تغيّر؟».
- قارن مع إكسل بتبويب «الموظفين»: الإجمالي، والتأمينات، والضريبة، والصافي. إذا في فرق، صلّح بملف الموظف أو بمدخلات الشهر واكبس «أعد الحساب».
- «قدّم للمراجعة»: المسير بيمشي على مسار الاعتماد: «اعتماد الموارد البشرية»، و«اعتماد المالية»، و«اعتماد المدير العام». أي حدا فيه «أرجع المسير» بسبب.
- «اقفل المسير» بس لما يتطابق الرقمين أو تعرف سبب كل فرق. بعد القفل بتطلع القسائم والملفات.
- من «الملفات والكشوف» نزّل ملف البنك وكشوف شام كاش والكاش والتأمينات والضريبة. وبعد ما تنصرف الرواتب اكبس «دفعنا».
القفل ما بيرجع: بعدو ما في تعديل. إذا ما عرفت سبب فرق، ابعتلنا من «دعم ديوان» قبل ما تقفل.
كتير شركات بتشغّل أول شهرين بالتوازي، وبعدين بتعتمد على ديوان لحالو. ولفهم الأرقام نفسها، شوف ضريبة الرواتب والتأمينات الاجتماعية.
مقالات قريبة
الشرح حسب ديوان بتاريخ ١٠ تشرين الأول ٢٠٢٦. البرنامج بيتطوّر، فإذا اسم بالشاشة صار غير يلي هون، الشاشة هي الصح.
